I a Hana Whaanga e tuku pukapuka ana i hopukina tōna panekoti roa ki ngā wira o tāna tūru.  Ka mau ia, ā, kāore rawa ia i āhei ki te tū ake, ki te whakaneke rānei i tāna tūru.  Nā te kiritaki e tatari ana kia tukuna mai āna pukapuka tētahi atu kaimahi i whakamōhio, ā, taro rawa ka wātea a Hana i a ia.  Mai i taua wā ka kōrero tahi a Hana me taua kiritaki i ngā wā ka haere mai ia ki te whare pukapuka.

“Kia tū koe hei kaiāwhina tiaki pukapuka me mānawa koe ki te whakawhānaunga,” te kī a Hana. “Nā te tāngata – me kī, te hunga ka toro mai me ngā kaimahi o roto – i tū ai ngā whare pukapuka.  Ka mākona ahau i te āwhina tangata ki te kimi rauemi me te whakaako i a rātou ki te whakamahi i ngā rārangi ingoa rauemi.  Kua tautokona rātou e au kia mahia e rātou anō.  He āhua rite tērā ki te whakaako, ā, ko te tūmanako ka mau i a rātou aua mōhiotanga.”

Ka āwhina a Hana i te tokomaha o ngā momo kiritaki whare pukapuka i roto i ōna tūranga mahi harangotengote i tētahi whare pukapuka rongoā me tētahi whare pukapuka kei tētahi whare wānanga.  I ēnei mahi e rua ka weheruatia te wā ki te manaaki kiritaki i te pae aroaro, ki ngā mahi whakahātepe, whakarite hoki i muri rā.  “I a au e tā ana, e whakapiri tohu ana hoki ki runga i ngā pukapuka kei te aroaro o taku rae tonu te whakaaro kei te whakaritea ēnei pukapuka kia taea ai e te tangata te tiki.  Me tino tika tāu whakarite i muri rā, kei raru ngā tāngata i tāu whakaputa i ngā pārongo hē.  Ko te takoto tika o ngā mea katoa te mea whakamānawa i ahau. Tērā pea, koinei taku āhua whai painga rawa atu e puta atu ana.”

Ahakoa he mea nui te āro i ngā āmiki, me whai pūkenga anō koe kia tino hira rawa ai koe hei kaiāwhina tiaki pukapuka, te kī a Hana.  “Me ngākau whakapuke, me pīrangi ki te ako, ā, me pīrangi hoki ki te āwhina i te tangata.  Nō te ao kōhatu te whakapono me kaha aroha ngā kaitiaki pātaka pukapuka ki ngā pukapuka.  Ehara i te mea mō te pukapuka anake tēnei mahi; ka haere, ka haere, ka rapuhia ā-rorohiko nei ngā rauemi e te ahumahi pārongo.”

“Heoi, te mutunga iho ko te mea nui ko te āwhina i ngā tāngata e kimi ana i tētahi mea.  Mā taku mahi e whai hua ai a tangata kē.”

Nō Ngāti Kahungunu a Hana.